ନବ ଦାସ ହତ୍ୟା ମାମଲା, ବିବାଦରେ ସାକ୍ଷୀଙ୍କ ସାର୍ଟର ରଙ୍ଗ

ଝାରସୁଗୁଡ଼ା , ୨୦/୧ : ୨୦୨୩ର ସବୁଠାରୁ ବହୁ ଚର୍ଚ୍ଚିତ ନବ ଦାସ ହତ୍ୟାକାଣ୍ଡର ତଦନ୍ତକୁ ନେଇ ଏବେ ଅନେକ ପ୍ରଶ୍ନବାଚୀ ସୃଷ୍ଟି ହୋଇଛି ।
କେତେବେଳେ ତଦନ୍ତ ରିପୋର୍ଟରେ ନବଦାସଙ୍କୁ ମରା ଯାଇଥିବା ଗୁଳିର ହିସାବ ମିଳୁନି ତ ଆଉ କେତେବେଳେ ଜବତ ସାମଗ୍ରୀ ତାଲିକାରେ ତାଙ୍କର ସାର୍ଟ ଗାଏବ୍ । ଏବେ ପୁଣି ଏକ ନୂଆ ପ୍ରସଙ୍ଗ ସାମ୍ନାକୁ ଆସିଛି । ମାମଲାର ସାକ୍ଷୀଙ୍କ ସାର୍ଟର ରଙ୍ଗ ବଦଳିଯାଇଥିବା ଦେଖିବାକୁ ମିଳିଛି ।
ପୂର୍ବତନ ମନ୍ତ୍ରୀ ନବ ଦାସ ହତ୍ୟା ମାମଲାରେ ଜବତ ପ୍ରପର୍ଟି ତାଲିକାରେ ଚାଞ୍ଚଲ୍ୟକର ତଥ୍ୟ ସାମ୍ନାକୁ ଆସିଛି । ଘଟଣାର ମୁଖ୍ୟ ସାକ୍ଷୀ ଥିବା ଶୁଭେନ୍ଦୁ ପଟ୍ଟନାୟକଙ୍କ ସାର୍ଟର ରଙ୍ଗ ବଦଳିଯାଇଥିବା ଦେଖାଯାଇଛି ।
ନବ ଦାସଙ୍କୁ ଘଟଣା ସ୍ଥଳରେ ଧରି ନେଇଥିବା ବ୍ୟକ୍ତି ତଥା ଘଟଣା ମୁଖ୍ୟ ସାକ୍ଷୀଙ୍କ ସାର୍ଟ ରଙ୍ଗ ହଳଦିଆରୁ ଧଳା ହୋଇଯାଇଥିବା ନେଇ କ୍ରାଇମବ୍ରାଞ୍ଚ ରିପୋର୍ଟରେ ଉଲ୍ଲେଖ କରାଯାଇଛି ।
ମୁଖ୍ୟ ସାକ୍ଷୀ ଧଳା ସାର୍ଟ ପିନ୍ଧି ଥିବା ନେଇ କ୍ରାଇମବ୍ରାଞ୍ଚ ରିପୋର୍ଟରେ ଉଲ୍ଲେଖ କରିଛି । ଯାହାକୁ ନେଇ ସନ୍ଦେହ ସୃଷ୍ଟି ହୋଇଛି । ଏହା ଏକ ତ୍ରୁଟି ନା ଜାଣିଶୁଣି ଏପରି କରାଯାଇଛି ତାହା ଏବେ ବଡ଼ ପ୍ରଶ୍ନ ।
ଅନ୍ୟପକ୍ଷରେ ନବଙ୍କ ରକ୍ତ ଭିଜା ସାର୍ଟକୁ ଭୁବନେଶ୍ୱରରେ ଚିକିତ୍ସା ହୋଇଥିବା ଏକ ହସ୍ପିଟାଲରେ ପୋଡ଼ି ଦିଆଯାଇଥିବା ନେଇ ସୂଚନା ମିଳିଛି । କୋଭିଡ୍ ପ୍ରୋଟୋକଲ୍ ଅନୁସାରେ ସାର୍ଟ ଓ ପ୍ୟାଣ୍ଟ ପୋଡ଼ି ଦିଆଯାଇଛି ନେଇ କ୍ରାଇମ୍‌ବ୍ରାଞ୍ଚ ହସ୍ପିଟାଲ କର୍ତ୍ତୃପକ୍ଷ ଜଣାଇଛନ୍ତି । ହସ୍ପିଟାଲ କର୍ତ୍ତୃପକ୍ଷଙ୍କ ରେକର୍ଡ କରାଯାଇଥିବା ବୟାନକୁ କୋର୍ଟରେ ଦାଖଲ କରାଯାଇଛି ।
ଅନ୍ୟପକ୍ଷରେ ଗୋପାଳଙ୍କ ଓକିଲ ପୂର୍ବରୁ କହିଥିଲେ ଯେ ଗୋପାଳ ଦାସଙ୍କ ଓକିଲଙ୍କ କହିବା ମୁତାବକ, ଗୋପାଳ ବନ୍ଧୁକରେ ଥିବା ୬ଟି ଗୁଳିରୁ ୩ଟି ଜୀବନ୍ତ ଅବସ୍ଥାରେ ଜବତ ହୋଇଥିବା ବେଳେ ବଳକା ୩ଟିରୁ ଗୋଟିଏ ନବ ଦାସଙ୍କ ଛାତିରେ, ଗୋଟିଏ ଅକାମୀ ଓ ଗୋଟିଏ ଆକାଶକୁ ମରାଯାଇଥିଲା ।
ଫାଙ୍କା ଗୁଳିର ଖୋକା ଓ ଅକାମୀ ଗୁଳି ମିଳିଥିବା ରିପୋର୍ଟରେ ଦର୍ଶାଯାଇଥିବାବେଳେ ନବ ଦାସଙ୍କ ଛାତିରେ ବାଜି ଥିବା ଗୁଳି କିମ୍ବା ଉକ୍ତ ଗୁଳିର ଖୋକା ମିଳି ନ ଥିବା ଗୋପାଳର ଓକିଲ କହିଛନ୍ତି । ସେହିପରି ସ୍ୱାସ୍ଥ୍ୟ ବିଭାଗ ଗାଡ଼ିରେ ୫ଟି ଗନ୍ ସଟ୍ ହୋଲ୍ ଅର୍ଥାତ୍ ଗୁଳି ବାଜି କଣା ହୋଇଯାଇଥିବା ଦେଖାଯାଇଥିଲା ।
କାରର ବାମ ପାର୍ଶ୍ଵରେ ଏହି ୫ଟି ଯାକ ଗୁଳି ବାଜିଥିଲେ ହେଁ ଏହି ଗୁଳିଗୁଡ଼ିକ କୁଆଡ଼େ ଗଲା ଓ ଗୁଳିର ଖୋକା କାହିଁକି ଘଟଣାସ୍ଥଳରୁ ମିଳିଲାନି ସେ ସମ୍ପର୍କରେ କ୍ରାଇମ୍‌ବ୍ରାଞ୍ଚ ନିଜ ରିପୋର୍ଟରେ କୌଣସି ତଥ୍ୟ ପ୍ରଦାନ କରି ନ ଥିବା ଗୋପାଳର ଓକିଲ କହିଛନ୍ତି ।