ମିଳିଲା ୧୨ ମାଓବାଦୀଙ୍କ ପରିଚୟ, ମୃତକଙ୍କ ମଧ୍ୟରେ କଟକ ଯୁବକ, ୧୮ ଲକ୍ଷ ଟଙ୍କା ଥିଲା ପୁରସ୍କାର
ନୂଆପଡା, ୨୪/୧ : ନୂଆପଡା ଜିଲ୍ଲା ଓ ଛତିଶଗଡ଼ ଗରିଆବନ୍ଧ ସୀମା କୁଲାରିଘାଟ ଜଙ୍ଗଲରେ ହୋଇଥିବା ନକ୍ସଲ ଏନକାଉଣ୍ଟରରେ ଦୁର୍ଦ୍ଦାନ୍ତ ମାଓବାଦୀ ଚଳପତି ସମେତ ୧୬ ମାଓବାଦୀଙ୍କ ମୃତ୍ୟୁ ହୋଇଥିଲା । ଏଥିମଧ୍ୟରୁ ୧୨ଜଣଙ୍କ ପରିଚୟ ମିଳିଛି । ବଡ କଥା ଯେ ମୃତକଙ୍କ ମଧ୍ୟରେ ଜଣେ କଟକ ଜିଲ୍ଲା ନିଆଳି କୁଲାଶ୍ରୀର ବୋଲି ଜଣାପଡିଛି । ଏହି ନକ୍ସଲର ନାମ ଆଲୋକ ଓରଫ ମୁନ୍ନା ହୋଇଥିବାବେଳେ ତା ମୁଣ୍ଡ ଉପରେ ୧୮ ଲକ୍ଷ ଟଙ୍କାର ପୁରସ୍କାର ରାଶି ଥିଲା ।
ଅନ୍ୟ ନିହତ ମାଓବାଦୀଙ୍କ ମଧ୍ୟରେ ଗୁଡ଼ୁ, ବାଉରୀବନ୍ଧୁ, ସୁଖରାମ, ସତ୍ୟମ, ଶଙ୍କର, ରିଙ୍କି, ଯଇନି, କାଲା, ରାମୀ ଓ ବିଜୟ । ରିଙ୍କି, ଯଇନି, କାଲା, ରାମୀ ମହିଳା ମାଓବାଦୀ ହୋଇଥିବାବେଳେ ବାଉରୀବନ୍ଧୁ ଓ ସୁଖରାମ ଚଳପତିର ସୁରକ୍ଷାରେ ନିୟୋଜିତ ଥିଲେ । ମାଓ ନେତା ଚଳପତି ସମେତ ୭ ଜଣଙ୍କର ମୁଣ୍ଡରେ ୧ କୋଟି ୭୫ ଲକ୍ଷ ଟଙ୍କାର ପୁରସ୍କାର ଥିଲା । ଏମାନଙ୍କ ମଧ୍ୟରୁ ବାଉରୀବନ୍ଧୁ ଜିଲ୍ଲା କମିଟି ମେମ୍ବର ଥିଲା, ତା ଉପରେ ୫ ଲକ୍ଷ ଟଙ୍କାର ପୁରସ୍କାର ଥିଲା ।
ସତ୍ୟମ ମୁଣ୍ଡ ଉପରେ ୨୦ ଲକ୍ଷ ଟଙ୍କା, ଗୁଡ଼ୁ ଉପରେ ୨୦ ଲକ୍ଷ ଟଙ୍କା ପୁରସ୍କାର ଘୋଷଣା କରାଯାଇଥିଲା । ମୃତ ୨ ମହିଳା ନକ୍ସଲ କାଲା, ରାମୀଙ୍କ ମୁଣ୍ଡ ଉପରେ ୧ ଲକ୍ଷ ଟଙ୍କାର ପୁରସ୍କାର ରାଶି ଥିବାବେଳେ ବିଜୟ ବି କେନ୍ଦ୍ରୀୟ କମିଟି ସଦସ୍ୟ ଥିଲା । ତା ନାମରେ ୩ ଲକ୍ଷ ଟଙ୍କାର ପୁରସ୍କାର ଥିଲା ।
