ପୋଲିସ ଏସ୍ଆଇ ପରୀକ୍ଷା ଦୁର୍ନୀତି ନେଇ ତନାଘନା : ଦୁଇ କାର୍ପଟଦାରଙ୍କ ନାଁକୁ ନେଇ ଚର୍ଚ୍ଚା ଜୋର
ଭୁବନେଶ୍ୱର , ୩/୧୦ : ଓଡ଼ିଶା ପୋଲିସ ରିକ୍ର୍ୟୁଟମେଣ୍ଟ ବୋର୍ଡ ଦ୍ୱାରା ପରିଚାଳିତ ଏସ୍ଆଇ ପରୀକ୍ଷା କେଳେଙ୍କାରୀରୁ ନେଇ ଗୋଟିଏ ପରେ ଗୋଟିଏ ସତ ସାମ୍ନାକୁ ଆସିବାରେ ଲାଗିଛି ।
ପରୀକ୍ଷା ଜାଲିଆତି ନେଇ ପ୍ରଥମେ ମୁଖ୍ୟମନ୍ତ୍ରୀଙ୍କୁ କାର୍ଯ୍ୟାଳୟ (ସିଏମ୍ଓ)ରେ ଖବର ପହଁଚିଥିଲା ବୋଲି ଚର୍ଚ୍ଚା ହେଉଛି । ସିଏମ୍ଓରୁ ବ୍ରହ୍ମପୁର ଏସପିଙ୍କ ନିକଟକୁ ତଦନ୍ତ ପାଇଁ ନିର୍ଦ୍ଦେଶ ଦିଆଯାଇଥିବା କୁହାଯାଉଛି ।
ତେଣୁ କେହି ଜଣେ ଏହି ଡିଲ୍ ବିଷୟରେ ସୂଚନା ପାଇ ସିଏମ୍ଓକୁ ଗୁପ୍ତ ସୂଚନା ଦେଇଥିବା ସନ୍ଦେହ ଦୃଢ଼ୀଭୂତ ହୋଇଛି । କହିବାକୁ ଗଲେ ଏଥିରେ ସିଧାସଳଖ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ହସ୍ତକ୍ଷେପ କରିଛି ।
ଗିରଫ ହୋଇଥିବା ଏସ୍ଆଇ ପରୀକ୍ଷାର୍ଥୀଙ୍କ ଅଭିଭାବକମାନେ ଗୁରୁତର ଅଭିଯୋଗ ଆଣିଛନ୍ତି । ଦଲାଲ ପିଲାଙ୍କ ସାର୍ଟିଫିକେଟ୍ ନେଇଯାଇଥିବା କହିଛନ୍ତି । ଅଭିଭାବକମାନେ ଆଜି ବ୍ରହ୍ମପୁର ଜେଲକୁ ଆସି ପିଲମାନଙ୍କୁ ଭେଟିବା ବେଳେ କହିଛନ୍ତି ।
ପଞ୍ଚସଫ୍ଟର ମୁଖ୍ୟ କୁହାଯାଉଥିବା ଦଲାଲ ଶଙ୍କର ପୃଷ୍ଟି କିଏ ତାହା ସ୍ପଷ୍ଟ ହୋଇପାରିନାହିଁ । ଏହା ସହିତ ଅନ୍ୟ ଜଣେ ସହଯୋଗୀ ମୁନା ମହାନ୍ତି କିଏ ତାହା ବି ଅସ୍ପଷ୍ଟ । ଏଥିରେ କେହି ବଡ଼ ଅଧିକାରୀ ସାମିଲ ଥିବା ଅନୁମାନ କରାଯାଉଛି ।
ପ୍ରକାଶ ଥାଉକି, ସେପ୍ଟେମ୍ବର ୩୦, ସୋମବାର ବିଳମ୍ବିତ ରାତିରେ ଏସଆଇ ପରୀକ୍ଷାରେ ଜାଲିଆତି ମାମଲାରେ ଆନ୍ଧ୍ର ପ୍ରଦେଶ ଶ୍ରୀକାକୁଲମରୁ ୧୧୭ ଜଣଙ୍କୁ ଗିରଫ କରାଯାଇଥିଲା ।
ପରୀକ୍ଷାର୍ଥୀଙ୍କୁ ପ୍ରଶ୍ନ ଉତ୍ତର ପ୍ରସ୍ତୁତି ପାଇଁ ଆନ୍ଧ୍ର ନିଆଯାଇଥିଲା । ପ୍ରତ୍ୟେକ ପରୀକ୍ଷାର୍ଥୀଙ୍କ ପିଛା ୨୦ରୁ ୨୫ ଲକ୍ଷ ଟଙ୍କା ଡିଲ୍ ହୋଇଥିଲା । ଦୁଇ ଦଫାରେ ଟଙ୍କା ଦିଆଯାଇଥାଆନ୍ତା । ପ୍ରଥମେ ସମସ୍ତେ ୧୦ ଲକ୍ଷ ଟଙ୍କା ଦେଇଥିଲେ ଏବଂ ପରୀକ୍ଷା ପରେ ଆଉ ବାକି ୧୫ ଲକ୍ଷ ଟଙ୍କା ଦଲାଲଙ୍କୁ ଦେଇ ଥାଆନ୍ତେ । ପ୍ରାୟ ୨୯ କୋଟି ଟଙ୍କାର କାରବାର ହେଉଥିଲା ।
କିନ୍ତୁ ଏହି ଖବର ପୋଲିସ କାନରେ ପଡ଼ିଥିଲା । ବ୍ରହ୍ମପୁର ଏସପି ଡାକ୍ତର ସର୍ବଣା ବିବେକଙ୍କ ନେତୃତ୍ୱରେ ଏକ ଟିମ୍ ସ୍ୱତନ୍ତ୍ର ଟିମ୍ ଆନ୍ଧ୍ର ଯାଇଥିଲା । ସେଠାରୁ ଦଲାଲ ସମେତ ଆଶାୟୀଙ୍କୁ ଗିରଫ କରିଛି ।
