ଭାଷଣ ନୁହେଁ, ଲୋକଙ୍କ କଥା ଶୁଣିବାକୁ ବାଛିଲେ ମନ୍ତ୍ରୀ ବିଭୂତି: ନବରଙ୍ଗପୁରରେ ଗଢ଼ିଉଠିଲା ଜନଆଶାର ଏକ ଅଭିନବ ମଞ୍ଚ
Minister Bibhuti Jena chooses direct feedback from public over making political speech
By A.K. Sahoo
ନବରଙ୍ଗପୁର: ଆଜିର ରାଜନୀତିରେ ସଭା ମାନେ ସାଧାରଣତଃ ଦୀର୍ଘ ଭାଷଣ, ପ୍ରତିଶ୍ରୁତି ଓ ସ୍ଲୋଗାନର ପ୍ରତିଯୋଗିତା। କିନ୍ତୁ ଓଡ଼ିଶାର ଇସ୍ପାତ ଓ ଖଣି ମନ୍ତ୍ରୀ ବିଭୂତି ଭୂଷଣ ଜେନା ସେହି ପରମ୍ପରାଠାରୁ ସମ୍ପୂର୍ଣ୍ଣ ଭିନ୍ନ ଏକ ବାଟ ବାଛିଲେ। ସେ କହିବା ଅପେକ୍ଷା ଶୁଣିବାକୁ ଅଧିକ ଗୁରୁତ୍ୱ ଦେଲେ।
ରାଜଧାନୀ ଭୁବନେଶ୍ୱରରୁ ପ୍ରାୟ ୫୬୦ କିଲୋମିଟର ଦୂର ଆକାଂକ୍ଷୀ ଜିଲ୍ଲା ନବରଙ୍ଗପୁରରେ ଜୁନ୍ ୨୯ ତାରିଖ ସୋମବାର ଦିନସାରା ବ୍ୟସ୍ତ କାର୍ଯ୍ୟକ୍ରମ ମଧ୍ୟରେ ସେ ଉମରକୋଟ ଓ ନବରଙ୍ଗପୁର ସହରରେ ସାଧାରଣ ଲୋକଙ୍କ ସହ ସିଧାସଳଖ ଆଲୋଚନା କରିଥିଲେ। ସେଠାରେ ଚାଷୀ, ଶିକ୍ଷକ, ସାମ୍ବାଦିକ, ଛାତ୍ରଛାତ୍ରୀ, ସାମାଜିକ କର୍ମୀ ଓ ବୁଦ୍ଧିଜୀବୀମାନେ ନିର୍ଭୟରେ ଜିଲ୍ଲାର ସମସ୍ୟା ଓ ସମ୍ଭାବନା ଉପସ୍ଥାପନ କରିଥିଲେ।
ସଭାରେ ନା ଥିଲା ରାଜନୈତିକ ସ୍ଲୋଗାନର କୋଳାହଳ, ନା ଥିଲା ଏକପାଖିଆ ଭାଷଣ। ବରଂ ମନ୍ତ୍ରୀ ଧୈର୍ଯ୍ୟର ସହ ପ୍ରତ୍ୟେକଙ୍କ କଥା ଶୁଣି ଟିପ୍ପଣୀ ରଖୁଥିଲେ। ଅପର୍ଯ୍ୟାପ୍ତ ସ୍ୱାସ୍ଥ୍ୟସେବା, ଡାକ୍ତର ଅଭାବ, ସେଚ ବ୍ୟବସ୍ଥାର ଦୁର୍ବଳତା, ମୋବାଇଲ୍ ନେଟୱର୍କ ସମସ୍ୟା, ବିଦ୍ୟାଳୟରେ ଶିକ୍ଷକ ଅଭାବ, ବିଜ୍ଞାନ ଶିକ୍ଷାର ସୁଯୋଗ ବୃଦ୍ଧି, ମକାର ଉପଯୁକ୍ତ ଦର, କ୍ଷୀର ଉତ୍ପାଦକ ଓ କେନ୍ଦୁପତ୍ର ସଂଗ୍ରହକାରୀଙ୍କ ସମସ୍ୟା—ସବୁକିଛି ଖୋଲାଖୋଲି ଆଲୋଚନା ହୋଇଥିଲା।
ପ୍ରତ୍ୟେକ ପ୍ରସଙ୍ଗର ଉତ୍ତର ଦେଇ ଶ୍ରୀ ଜେନା ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱାଧୀନ କେନ୍ଦ୍ର ସରକାର ଏବଂ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ସରକାର ଗ୍ରହଣ କରିଥିବା ବିଭିନ୍ନ ପଦକ୍ଷେପ ସମ୍ପର୍କରେ ବିସ୍ତୃତ ଆଲୋକପାତ କରିଥିଲେ। ଦୀର୍ଘଦିନର ବାମପନ୍ଥୀ ଉଗ୍ରବାଦ ପ୍ରଭାବରୁ ବାହାରି ଆସୁଥିବା ନବରଙ୍ଗପୁର ଭଳି ଜିଲ୍ଲାରେ ଭିତ୍ତି ଭୂମି, ଶିକ୍ଷା, ସ୍ୱାସ୍ଥ୍ୟ ଓ ଜୀବିକା କ୍ଷେତ୍ରରେ ଲକ୍ଷ୍ୟ ଭିତ୍ତିକ ବିନିଯୋଗ ହିଁ ବିକାଶର ନୂଆ ଦିଗ ଖୋଲିବ ବୋଲି ସେ କହିଥିଲେ।
ତେବେ ଉପସ୍ଥିତ ଲୋକଙ୍କ ମନରେ ସବୁଠାରୁ ଅଧିକ ଛାପ ଛାଡ଼ିଥିଲା ମନ୍ତ୍ରୀଙ୍କ ଉତ୍ତର ନୁହେଁ, ବରଂ ତାଙ୍କର ଶୁଣିବାର ଧୈର୍ଯ୍ୟ।
ନବରଙ୍ଗପୁରର ବରିଷ୍ଠ ସାମ୍ବାଦିକ ଓ ବିକାଶ କର୍ମୀ ବାଙ୍କବିହାରୀ ବିଷୋୟୀ କହିଥିଲେ, “ବହୁତ କମ୍ ମନ୍ତ୍ରୀ ଅଛନ୍ତି, ଯେଉଁମାନେ ଏତେ ସମୟ ଧରି କେବଳ ଲୋକଙ୍କ କଥା ଶୁଣନ୍ତି। ଏଠାରେ ଲୋକମାନେ କରତାଳି ପାଇଁ ଆସିନଥିଲେ; ସେମାନେ ନିଜ ଜୀବନର ବାସ୍ତବତାକୁ କେହି ବୁଝନ୍ତୁ ବୋଲି ଚାହୁଁଥିଲେ। ଏଭଳି ସିଧାସଳଖ ସଂଳାପ ଶାସନ ବ୍ୟବସ୍ଥା ପ୍ରତି ଲୋକଙ୍କ ବିଶ୍ୱାସକୁ ଆହୁରି ସୁଦୃଢ଼ କରେ।
ପରେ ଏହି ପ୍ରତିନିଧିଙ୍କ ସହ କଥା ବାର୍ତ୍ତାରେ ମନ୍ତ୍ରୀ କହିଥିଲେ, “ଲୋକଙ୍କୁ ଖୋଲାଖୋଲି କଥା କହିବାର ସୁଯୋଗ ଦେଲେ ସେମାନେ ଶାସନ ବ୍ୟବସ୍ଥାର ଦୁର୍ବଳତାକୁ ନିର୍ଭୟରେ ଜଣାଇଥାନ୍ତି। ଆମେ କାହା ଉପରେ ଦୟା କରିବାକୁ ଆସିନାହୁଁ। ଆମେ ଜନସାଧାରଣଙ୍କ ସେବକ। ସେମାନଙ୍କ କଥାକୁ ଧୈର୍ଯ୍ୟ, ସହାନୁଭୂତି ଓ ଆନ୍ତରିକତାର ସହ ଶୁଣିବା ଏବଂ ସମସ୍ୟାର ସମାଧାନ କରିବା ଆମର କର୍ତ୍ତବ୍ୟ।
ଏହି ଆଲୋଚନା କେବଳ ଅଭିଯୋଗରେ ସୀମିତ ରହିନଥିଲା। ସେଚ ବ୍ୟବସ୍ଥାର ସମ୍ପ୍ରସାରଣ, ପ୍ଲସ୍-ଟୁ ଓ ଡିଗ୍ରୀ ସ୍ତରରେ ବିଜ୍ଞାନ ଶିକ୍ଷାର ବ୍ୟବସ୍ଥା, ଦୁଗ୍ଧ ଭିତ୍ତିିଭୂମିର ବିକାଶ, ଆୟୁର୍ବେଦର ପ୍ରୋତ୍ସାହନ, ଝରିଗାଁ ଓ ଚନ୍ଦାହାଣ୍ଡି ପର୍ଯ୍ୟନ୍ତ ରେଳ ସଂଯୋଗ, ଗ୍ରାମାଚଂଳରେ ବର୍ଜ୍ୟ ପରିଚାଳନା ଏବଂ ପଦାଗଡ଼ର ପ୍ରାଚୀନ ନଳ ବଂଶର ଇତିହାସକୁ ପାଠ୍ୟକ୍ରମରେ ସାମିଲ କରିବା ଭଳି ଅନେକ ଗଠନମୂଳକ ପ୍ରସ୍ତାବ ମଧ୍ୟ ଆସିଥିଲା।
ଏହି ସମସ୍ତ ପ୍ରସ୍ତାବରେ ଗୋଟିଏ ସାଧାରଣ ସ୍ୱର ସ୍ପଷ୍ଟ ହେଉଥିଲା—ଲୋକେ କେବଳ ସରକାରୀ ସହାୟତା ଚାହୁଁନାହାନ୍ତି; ସେମାନେ ସୁଯୋଗ ଚାହୁଁଛନ୍ତି। ଉନ୍ନତ ଶିକ୍ଷା, ଉନ୍ନତ ସ୍ୱାସ୍ଥ୍ୟସେବା, ଭଲ ବଜାର ବ୍ୟବସ୍ଥା, ମଜବୁତ ଭିତ୍ତିିଭୂମି ଏବଂ ନିଜର ଇତିହାସ ଓ ସଂସ୍କୃତିର ଯଥାର୍ଥ ସ୍ୱୀକୃତି—ଏହା ହିଁ ସେମାନଙ୍କ ଆକାଂକ୍ଷା।
ଗଞ୍ଜାମ ଜିଲ୍ଲାର ଗୋପାଳପୁର ବିଧାନସଭା ଆସନର ପ୍ରତିନିଧି ହେବା ସହ ରାୟଗଡ଼ା ଜିଲ୍ଲାର ସାଂଗଠନିକ ଦାୟିତ୍ୱ ମଧ୍ୟ ବହନ କରୁଥିବା ବିଭୂତି ଭୂଷଣ ଜେନା ସରଳ ଜୀବନଶୈଳୀ ଓ ଆଧ୍ୟାତ୍ମିକ ଚିନ୍ତାଧାରା ପାଇଁ ପୂର୍ବରୁ ପରିଚିତ। ନବରଙ୍ଗପୁରର ଏହି ଗସ୍ତ ପୁଣି ଥରେ ଦେଖାଇଦେଲା, ସୁଶାସନର ଆରମ୍ଭ ସବୁବେଳେ ଭାଷଣରୁ ହୁଏ ନାହିଁ; ବରଂ ଲୋକଙ୍କ କଥାକୁ ମନଦେଇ ଶୁଣିବାରୁ ହିଁ ତାହାର ପ୍ରକୃତ ଯାତ୍ରା ଆରମ୍ଭ ହୁଏ।
