ଆଜିଠୁ ମିଶନ୍ ଅଲିଭ ରିଡ୍ଲେ : ୭ ମାସ ପାଇଁ ପାରାଦୀପ ସମୁଦ୍ର ଓ ଗହୀରମଥା ସାମୁଦ୍ରିକ ଅଭୟାରଣ୍ୟରେ ଲାଗିଲା କଟକଣା
କେନ୍ଦ୍ରାପଡ଼ା, ୧/୧୧ : ଆଜିଠାରୁ ସାତ ମାସ ଯାଏ ସମୁଦ୍ରରେ ମାଛ ଧରା ବନ୍ଦ । ବିରଳ ଅଲିଭ୍ ରିଡଲେ କଇଁଛଙ୍କ ଅଣ୍ଡାଦାନ ପାଇଁ ବନ ବିଭାଗ ପକ୍ଷରୁ କଟକଣା ଜାରି କରାଯାଇଛି । ଆଜିଠାରୁ ଆସନ୍ତା ବର୍ଷ ମେ ୩୧ ପର୍ୟ୍ୟନ୍ତ ସମୁଦ୍ର କୌଣସି ମତ୍ସ୍ୟଜୀବୀ ମାଛ ଧରିପାରିବେ ନାହିଁ । ଋଷିକୂଲ୍ୟା, ଭିତରକନିକା, ଧାମରା ଓ ଦେବୀ ନଦୀ ମୁହାଣ ଆଦି ସ୍ଥାନ ଗୁଡ଼ିକରେ ମାଛଧରା ନିଷେଧ ରହିଛି ।
ସମୁଦ୍ରକୂଳ ଠାରୁ ୨୦ କିଲୋମିଟର ପର୍ୟ୍ୟନ୍ତ ଏହି କଟକଣା ଲାଗୁ କରାଯାଇଛି । କଇଁଛ ଆସିବା, ଅଣ୍ଡାଦାନ ସ୍ଥାନ ଓ ଅଣ୍ଡାଦାନ ସମୟରେ କୌଣସି ଯନ୍ତ୍ରଚାଳିତ ବୋଟ୍ ଏହି ନିର୍ଦ୍ଧିଷ୍ଟ ସୀମା ମଧ୍ୟରେ ମାଛ ଧରିବେ ପାରିବେ ନାହିଁ । କେବଳ ପାରମ୍ପାରିକ ଡଙ୍ଗା (ସାଢ଼େ ଆଠ ମିଟରରୁ କମ୍) ଯେଉଁଥିରେ କୌଣସି ମୋଟର୍ କିମ୍ବା ଯନ୍ତ୍ର ବ୍ୟବହାର ହୋଇନଥିବା ସେହିଗୁଡ଼ିକ ହିଁ ମାଛ ମାରିବାକୁ ଅନୁମତି ପାଇବେ ।
ଅନ୍ୟପକ୍ଷରେ ଅଲିଭ ରିଡଲେଙ୍କ ଅଣ୍ଡାଦାନ ପାଇଁ ସୁରକ୍ଷା ବ୍ୟବସ୍ଥାକୁ ମଧ୍ୟ କଡ଼ାକଡ଼ି କରାଯାଇଛି । ବିଭିନ୍ନ ବିଭାଗ ଯଥା ବନ ବିଭାଗ, ମତ୍ସ୍ୟ ବିଭାଗ ଓ କୋଷ୍ଟଗାର୍ଡ ପକ୍ଷରୁ ବ୍ୟାପକ ପ୍ରସ୍ତୁତି କରାଯାଇଛି । କୌଣସି ବ୍ୟକ୍ତି ଏହି ଆଇନ ଉଲ୍ଲଂଘନ କରିବେ ସେମାନଙ୍କ ଉପରେ ଦୃଢ଼ କାର୍ୟ୍ୟାନୁଷ୍ଠାନ କରାଯିବ । ଯଦି ଧରାପଡ଼ିବେ ଗରିଫ ହେବା ସହିତ ଜେଲ ଓ ଜରିମାନା ଦଣ୍ଡରେ ଦଣ୍ଡିତ କରାଯିବ ବୋଲି ସରକାର କଡ଼ା ନିର୍ଦ୍ଦେଶ ଦେଇଛନ୍ତି ।
