ଖୋର୍ଦ୍ଧାରୋଡ଼ ମଣ୍ଡଳର ଠିକାଦାର ମାନଙ୍କ ପାଇଁ ଶ୍ରମ ଆଇନ ସମ୍ପର୍କିତ ଆଲୋଚନାଚକ୍ର ଓ କର୍ମଶାଳା ଆୟୋଜିତ
ପ୍ରସନ୍ନ କୁମାର ପାଇକରାୟଙ୍କ ରିପୋର୍ଟ
ଖୋରଧା, ୧୩/୫ : ଖୋର୍ଦ୍ଧାରୋଡ଼ ମଣ୍ଡଳ ଅଧୀନରେ ବିଭିନ୍ନ ରେଳ କାର୍ଯ୍ୟରେ ନିୟୋଜିତ ଥିବା ଠିକାଦାର ମାନଙ୍କ ମଧ୍ୟରେ ଆଇନଗତ ବ୍ୟବସ୍ଥା, ଶ୍ରମ ନିୟମାବଳୀ ଏବଂ ଶ୍ରମିକ କଲ୍ୟାଣକାରୀ ପଦକ୍ଷେପ ବିଷୟରେ ସଚେତନତା ସୃଷ୍ଟି କରିବା ପାଇଁ ଏକ ଆଲୋଚନାଚକ୍ର ତଥା କର୍ମଶାଳା ଆୟୋଜିତ ହୋଇଯାଇଛି। ଶ୍ରମ ପ୍ରବର୍ତ୍ତନ ବିଭାଗର ସହଯୋଗରେ ଏହି କାର୍ଯ୍ୟକ୍ରମଟି ଅନୁଷ୍ଠିତ ହୋଇଥିଲା।
ଭୁବନେଶ୍ୱରର ଶ୍ରମ ପ୍ରବର୍ତ୍ତନ ଅଧିକାରୀ (କେନ୍ଦ୍ରୀୟ)-୨ ଶ୍ରୀ ଅଜୟ କୁମାର ଏହି ସଚେତନତା ଶିବିର ପରିଚାଳନା କରିଥିଲେ। ସେ ଶ୍ରମିକ ମାନଙ୍କର କଲ୍ୟାଣ, ସୁରକ୍ଷା ନିୟମ, ମଜୁରୀ ପ୍ରଦାନ, କାର୍ଯ୍ୟ କରିବାର ପରିବେଶ ଏବଂ ଠିକାଦାର ମାନଙ୍କର ଆଇନଗତ ଦାୟିତ୍ୱ ସମ୍ପର୍କରେ ବିସ୍ତୃତ ଭାବେ ବୁଝାଇଥିଲେ।
ଏହି ଅବସରରେ ଏକ ମତ ବିନିମୟ କାର୍ଯ୍ୟକ୍ରମ ମଧ୍ୟ ହୋଇଥିଲା, ଯେଉଁଠାରେ ଠିକାଦାର ମାନେ ଶ୍ରମ ଆଇନ ପାଳନ, ଅନୁମତି ପତ୍ର (ଲାଇସେନ୍ସ) ଏବଂ ଅନ୍ୟାନ୍ୟ ସରକାରୀ ନିୟମ ସମ୍ବନ୍ଧରେ ଥିବା ନିଜର ସନ୍ଦେହ ଦୂର କରିଥିଲେ।
ଶ୍ରମିକ ମାନଙ୍କ ଉନ୍ନତି ପାଇଁ ରେଳ ପ୍ରଶାସନ, ଠିକାଦାର ଏବଂ ଶ୍ରମ ବିଭାଗ ମଧ୍ୟରେ ଉତ୍ତମ ସମନ୍ୱୟ ରକ୍ଷା କରିବା ଉପରେ ଏଥିରେ ଗୁରୁତ୍ୱ ଦିଆଯାଇଥିଲା।
ଏହି କାର୍ଯ୍ୟକ୍ରମରେ ଅତିରିକ୍ତ ମଣ୍ଡଳ ରେଳ ପ୍ରବନ୍ଧକ (ପରିଚାଳନା) ଶ୍ରୀ ପି. କେ. ବେହେରା, ବିଭିନ୍ନ ବିଭାଗୀୟ ଅଧିକାରୀ ଏବଂ ଖୋର୍ଦ୍ଧାରୋଡ଼ ମଣ୍ଡଳର ଅନେକ ଠିକାଦାର ଯୋଗ ଦେଇଥିଲେ। କର୍ମଶାଳାରେ ରେଳ ପ୍ରତିଷ୍ଠାନ ଗୁଡ଼ିକରେ କାର୍ଯ୍ୟରତ ଠିକା ଶ୍ରମିକ ମାନଙ୍କର ସୁରକ୍ଷା ଓ ସାମାଜିକ ସୁରକ୍ଷା ନିଶ୍ଚିତ କରିବା ପାଇଁ ସରକାରୀ ନିୟମାବଳୀକୁ କଠୋର ଭାବେ ପାଳନ କରିବାକୁ ନିର୍ଦ୍ଦେଶ ଦିଆଯାଇଥିଲା।
ସମସ୍ତ ଠିକାଦାରଙ୍କୁ ଶ୍ରମ ନିୟମ ପାଳନ କରିବା ପାଇଁ ଏବଂ ଶ୍ରମିକ ମାନଙ୍କ ପାଇଁ ଏକ ସୁରକ୍ଷିତ ତଥା ନ୍ୟାୟପୂର୍ଣ୍ଣ କାର୍ଯ୍ୟ ପରିବେଶ ତିଆରି କରିବାକୁ ଅନୁରୋଧ କରାଯାଇ ଏହି କର୍ମଶାଳାଟିକୁ ସମାପ୍ତ କରାଯାଇଥିଲା
