ବର ନିଜ ବାହାଘର ପ୍ରସେସନରେ ନାଚୁଥିବା ବେଳେ କନ୍ୟା ଅନ୍ୟ ଜଣଙ୍କୁ ବିବାହ କରିଦେଲେ
ରାଜସ୍ଥାନ,୧୮/୫: ମଦୁଆ ବରକୁ ପାନେ ଦେଲେ କନ୍ୟା । ବାହା ହେବାକୁ ଆସି ମଦ ପିଇ ନାଚରେ ମାତିଥିଲା ବର । ସମୟ ଗଡ଼ିବାରୁ କନ୍ୟା ଅପେକ୍ଷା ନକରି ଅନ୍ୟ ଜଣଙ୍କୁ ବାହା ହୋଇଗଲା । ଏମିତି କିଛି ଘଟଣା ରାଜସ୍ଥାନର ଚୁରୁ ଜିଲ୍ଲା ରାଜଗଡ଼ ତହସିଲର ଚେଲନା ଗାଁରେ ଦେଖିବାକୁ ମିଳିଛି ।
ରବିବାର ଦିନ ଗାଁରେ ବାହାଘର ଚାଲିଥିଲା ବେଳେ ବର ଆସି ରାତି ୯ଟା ବେଳକୁ ଗାଁରେ ପହଞ୍ଚି ଯାଇଥିଲା । ଅଳ୍ପ ସମୟ ପରେ ବାହାଘର ପାଇଁ ଶୁଭ ମୁହୂର୍ତ୍ତ ଥିଲା ବେଳେ ବରଯାତ୍ରୀଙ୍କ ସହ ଘଣ୍ଟା ଘଣ୍ଟା ଧରି ମଦ ପିଇ ବର ନାଚିଥିବାର ଦେଖିବାକୁ ମିଳିଥିଲା । ବର ମାତିଥିବାବେଳେ ଏଣେ ଶୁଭ ମୁହୂର୍ତ୍ତି ଗଡ଼ି ଯାଉଥିଲା । ଆଉ ଶେଷରେ ବାହା ହେବାକୁ ଅପେକ୍ଷା କରିଥିବା ଯୁବତୀ ଓ ତାଙ୍କ ପରିବାର ଏଥିରେ ରାଗିଯାଇ ବର ଓ ବରପକ୍ଷଙ୍କୁ ପାନେ ଦେବା ଲାଗି ଅନ୍ୟ ଜଣଙ୍କ ସହ ବାହାଘର କରିବାକୁ ନିଷ୍ପତ୍ତି ନେଇଥିଲେ ।
