ହୋହାଲ୍ଲା ସତ୍ତ୍ବେ ୨୦ ମିନିଟ୍ ଚାଲିଲା ପ୍ରଶ୍ନକାଳ, ୪ଟା ଯାଏଁ ଗୃହ ମୁଲତବୀ
ଭୁବନେଶ୍ୱର, ୨୩/୯ : ମୌସୁମୀ ଅଧିବେଶନରେ ପଞ୍ଚମ ଦିନରେ ବିରୋଧୀଙ୍କ ହଟ୍ଟଗୋଳ ମଧ୍ୟରେ ମାତ୍ର ୨୦ ମିନିଟ୍ ପ୍ରଶ୍ନକାଳ ଚାଲିପାରିଛି । ବାରମ୍ବାର ନିବେଦନ ସତ୍ୱେ ବିରୋଧୀ ହୋହାଲ୍ଲା ଜାରି ରଖିବାରୁ ବାଚସ୍ପତି ମହୋଦୟା ସୁରମା ପାଢ଼ୀ ଗୃହ କାର୍ଯ୍ୟକୁ ଅପରାହ୍ନ ୪ଟା ଯାଏଁ ମୁଲତବୀ ଘୋଷଣା କରିଛନ୍ତି ।
ଆଜି ମଧ୍ୟ ସମାନ ସ୍ଥିତି ଦେଖିବାକୁ ମିଳିଥିଲା । ପ୍ରଶ୍ନ କାଳ ଆରମ୍ଭରୁ ହୋହାଲ୍ଲା ଏବଂ ନାରାବାଜି ହୋଇଛି । ବିଜେଡ଼ି ବିଧାୟକ ପ୍ରଶ୍ନକାଳ ଆରମ୍ଭରୁ ପଞ୍ଚାୟତ ବ୍ୟବସ୍ଥାରେ ଜନପ୍ରିତିନିଧିଙ୍କ କ୍ଷମତା ସଙ୍କୁଚିତ କରିବା ପ୍ରସଙ୍ଗ ଉଠାଇ ହଙ୍ଗାମା କରିଥିଲେ ।
ସିଧାସଳଖ ଗୃହର ମଧ୍ୟ ଭାଗକୁ ଆସି ବାଚସ୍ପତିଙ୍କ ପୋଡ଼ିୟମ ବାଡ଼େଇଥିଲେ । ମୋହନ ସରକାର ବିରୋଧରେ ନାରାବାଜି ଦେଇଥିଲେ । ସେପଟେ କଂଗ୍ରେସ ବିଧାୟକମାନେ ନିଜ ନିଜ ଆସନରେ ଛିଡ଼ା ହୋଇ ମଧ୍ୟ ପ୍ରତିବାଦ କରିଛନ୍ତି ।
ବିରୋଧୀଙ୍କୁ ଗୃହରେ ଶୃଙ୍ଖଳା ବଜାୟ ରଖିବାକୁ ବାରମ୍ବାର ନିବେଦନ କରିଛନ୍ତି । ଏପରିକି ବାଚସ୍ପତି ଛିଡ଼ା ହୋଇ ନାରାବାଜି ନ କରି ପ୍ରଶ୍ନକାଳ ଭଳି ଗୁରୁତ୍ୱପୂର୍ଣ୍ଣ ସମୟକୁ ନଷ୍ଟ ନ କରିବାକୁ ଅନୁରୋଧ କରିଥିଲେ । କିନ୍ତୁ ବିରୋଧୀ ସଦସ୍ୟମାନେ ଚୁପ ବସିନଥିଲେ ।
ଏପରିକି ପୋଷ୍ଟର ବ୍ୟାନର ବାଚସ୍ପତିଙ୍କ ସମ୍ମୁଖରେ ଦେଖାଇଛନ୍ତି । ତଥାପି ବାଚସ୍ପତି ଗୃହ କାର୍ୟ୍ୟକୁ ଜାରି ରଖିଥିଲେ । ପଞ୍ଚାୟତରାଜ ବିଭାଗ ଏବଂ ଜଙ୍ଗଲ ଓ ପରିବେଶ ସୁରକ୍ଷା ବିଭାଗକୁ ପଚରାଯାଇଥିବା ପ୍ରଶ୍ନରେ ବିଭାଗୀୟ ମନ୍ତ୍ରୀମାନେ ଉତ୍ତର ରଖିଥିଲେ । କିନ୍ତୁ ବିରୋଧୀଙ୍କ ପ୍ରବଳ ହଟ୍ଟଗୋଳ ଯୋଗୁଁ ବାଚସ୍ପତି ଗୃହ କାର୍ୟ୍ୟକୁ ସ୍ଥଗିତ ରଖିଛନ୍ତି ।
