ସାବାଡ଼ ହେବେ ଅଳସୁଆ ଓ କାମଚୋର କର୍ମଚାରୀ : ପଞ୍ଚାୟତ କର୍ମଚାରୀଙ୍କଠୁ ବିଡିଓଙ୍କ ଯାଏଁ ବାୟୋମେଟ୍ରିକ୍ ଉପସ୍ଥାନ ବାଧ୍ୟତାମୂଳକ
ଭୁବନେଶ୍ୱର, ୬/୯ : ରାଜ୍ୟ ସରକାର ବାୟୋମେଟ୍ରିକ ଉପସ୍ଥାପନାକୁ ବାଧ୍ୟତାମୂଳକ କରାଯାଇଛି । ପଞ୍ଚାୟତ କର୍ମଚାରୀଙ୍କ ଠାରୁ ଆରମ୍ଭ କରି ମଣ୍ଡଳ ଉନ୍ନୟନ ଅଧିକାରୀ ବାୟୋମେଟ୍ରିକରେ ଉପସ୍ଥାପନ ଦେବେ ବୋଲି ପଞ୍ଚାୟତରାଜ ବିଭାଗ ପକ୍ଷରୁ ନିର୍ଦ୍ଦେଶ ଦିଆଯାଇଛି ।
ପଞ୍ଚାୟତ, ପଞ୍ଚାୟତ ସମିତି, ଜିଲ୍ଲା ପରିଷଦ କାର୍ଯ୍ୟାଳୟରେ ବାୟୋମେଟ୍ରିକ ମେସିନ ଲଗାଯିବ । ସମସ୍ତ କାର୍ଯ୍ୟାଳୟରେ ଯଥାଶୀଘ୍ର ବାୟୋମେଟ୍ରିକ ବ୍ୟବସ୍ଥା କାର୍ଯ୍ୟକାରୀ କରିବାକୁ ସରକାର ନିର୍ଦ୍ଦେଶ ଦେଇଛନ୍ତି । ଯାହା ଦ୍ୱାରା କର୍ମଚାରୀମାନେ କେତେବେଳେ ଆସୁଛନ୍ତି, କେତେବେଳେ ଯାଉଛନ୍ତି ଏବଂ ମାସରେ କେତେ ଦିନ ଅପସ୍ଥିତ ଓ ଅନୁପସ୍ଥିତ ରହୁଛନ୍ତି ତାହା ସବୁ ରେକର୍ଡ ହୋଇପାରିବ ।
ଏଠାରେ ଉଲ୍ଲେଖ ଯୋଗ୍ୟ, ଗତମାସରେ ରାଜସ୍ୱ ବିଭାଗରେ ବାୟୋମେଟ୍ରିକ ଉପସ୍ଥାପନାକୁ ବିଭାଗୀୟ ମନ୍ତ୍ରୀ ବାଧ୍ୟତାମୂଳକ କରିଥିଲେ । ରାଜସ୍ୱ କର୍ମଚାରୀମାନେ ବାୟୋମେଟ୍ରିକ୍ ଆଙ୍ଗୁଠି ଛାପ ଦେଇ କାର୍ୟ୍ୟାଳୟ ଭିତରକୁ ପ୍ରବେଶ କରିବେ । ଏ ନେଇ ସମସ୍ତ ଜିଲ୍ଲାପାଳଙ୍କୁ ରାଜସ୍ୱ ବିଭାଗ ଚିଠି ଲେଖିଥିଲେ ।
ଗତ ବର୍ଷ ରାଜସ୍ୱ ମନ୍ତ୍ରୀ ସୁରେଶ ପୂଜାରୀ ଅନେକ ରାଜସ୍ୱ କାର୍ଯ୍ୟାଳୟ ପରିଦର୍ଶନ କରି ଅସନ୍ତୋଷ ପ୍ରକାଶ କରିଥିଲେ । କାର୍ଯ୍ୟାଳୟରେ କର୍ମଚାରୀ ଅନୁପସ୍ଥିତି ଦେଖିବା ପରେ ମନ୍ତ୍ରୀ କ୍ଷୁବ୍ଧ ହୋଇଥିଲେ । ଯାହା ପରେ କାର୍ଯ୍ୟାଳୟରେ ବାୟୋମେଟ୍ରିକ୍ ବ୍ୟବସ୍ଥା କରିବାକୁ ନିଷ୍ପତ୍ତି ନିଆଯାଇଛି ।
