ରଣକ୍ଷେତ୍ର ପାଲଟିଲା ଲୋୟର ପିଏମ୍ଜି : ପୋଲିସ ସହ ବିଜେଡି କର୍ମୀଙ୍କର ଧସ୍ତାଧସ୍ତି, ବିକ୍ଷୋଭକାରୀଙ୍କ ଉପରକୁ ପାଣି ମାଡ଼
ଭୁବନେଶ୍ୱର , ୨୩/୯ : ପଞ୍ଚାୟତ ପ୍ରତିନିଧିଙ୍କ କ୍ଷମତା ସଙ୍କୁଚିତ କରିବା ପ୍ରତିବାଦରେ ବିଜୁ ଜନତା ଦଳ ବିଧାନସଭା ଘେରାଉ କରିବାକୁ ଉଦ୍ୟମ କରିଛି । ସୁରକ୍ଷାବଳୟ ଭାଙ୍ଗିବାକୁ ଚେଷ୍ଟା କରୁଥିବାବେଳେ ପୋଲିସ କିଛି ବିଜେଡ଼ି କର୍ମୀଙ୍କୁ ଉଠାଇ ନେଇଛି ।
ବିଜେଡ଼ି ଆଜି ବିଧାନସଭା ଘେରାଉ ଡାକରା ଦେଇଛି । ଗାନ୍ଧୀ ମାର୍ଗରେ ଶହ ଶହ ସଂଖ୍ୟାରେ କର୍ମୀ ଗର୍ଜିଛନ୍ତି । ବହୁ ସରପଞ୍ଚ, ବ୍ଲକ ଅଧ୍ୟକ୍ଷ, ୱାର୍ଡମେମ୍ବରଙ୍କଠାରୁ ଆରମ୍ଭ କରି ବଡ଼ ବଡ଼ ନେତା ସାମିଲ ହୋଇଛନ୍ତି । ପ୍ରତାପ ଜେନା, ସଞ୍ଜୟ ଦାସବର୍ମା, ସୁଲୋଚନା ଦାସ, ସୁଲତା ଦେଓ, ଚିନ୍ମୟ ସାହୁ ଏବଂ ଇପସିତା ସାହୁ ପ୍ରମୁଖ ଆନ୍ଦୋଳନର ନେତୃତ୍ୱ ନେଇଛନ୍ତି ।
ବିକ୍ଷୋଭକାରୀମାନେ ଗୋଟିଏ ପରେ ଗୋଟିଏ ବ୍ୟାରିକେଡ୍ ଭାଙ୍ଗି ବିଧାନସଭା ଅଭିମୁଖେ ଅଗ୍ରସର ହେଉଥିବାବେଳେ ସୁରକ୍ଷାକର୍ମୀଙ୍କ ପକ୍ଷରୁ ପ୍ରତିହତ କରିବାକୁ ଚେଷ୍ଟା କରାଯାଇଛି । ଦୁଇଟି ବାଉଁଶ ବ୍ୟାରିକେଡ ଭାଙ୍ଗିଛନ୍ତି । ଆନ୍ଦୋଳନକାରୀଙ୍କୁ ରୋକିବା ପାଇଁ ପୋଲିସ ପକ୍ଷରୁ ପାଣି ମାଡ଼ କରାଯାଇଛି । ଫଳରେ କିଛି କର୍ମକର୍ତ୍ତା ଛତ୍ରଭଙ୍ଗ ଦେଇଥିବାବେଳେ ପୋଲିସ କିଛି ନେତା ଏବଂ କର୍ମୀଙ୍କୁ ଉଠାଇ ନେଇଛି ।
ମୋଟ ୨୮ ପ୍ଲାଟୁନ ପୋଲିସ ଫୋର୍ସ ମୁତୟନ କରାଯାଇଛି । ବିଧାନସଭାକୁ ମଧ୍ୟ କଡ଼ା ସୁରକ୍ଷା ବଳୟ ମଧ୍ୟରେ ରଖାଯାଇଛି । ତ୍ରିସ୍ତରୀୟ ସୁରକ୍ଷା ବଳୟରେ ରହିଛି ବିଧାନସଭା ।
