ପଟ୍ଟାମୁଣ୍ଡାଇ ଛାତ୍ରୀ ମୃତ୍ୟୁ ମାମଲା: ମୁଖ୍ୟ ଅଭିଯୁକ୍ତକୁ ଚେନ୍ନାଇରୁ ଧରିଲା ପୁଲିସ
ଭୁବନେଶ୍ୱର, ୮/୮ : କେନ୍ଦ୍ରାପଡା ପଟ୍ଟାମୁଣ୍ଡାଇରେ ଯୁବତୀ ଜିଅନ୍ତା ଜଳିଯିବା ମାମଲାରେ ଆସିଛି ବଡ ଖବର । ଚେନ୍ନାଇରୁ ଧରା ପଡିଛନ୍ତି ଯୁବତୀଙ୍କ ପୁରୁଷ ବନ୍ଧୁ । ଚେନ୍ନାଇରେ ଯୁବକକୁ ଧରି ନିଜ ହେପାଜତକୁ ନେଇଛି ପୋଲିସ । ଯୁବକକୁ ଧରି ପୋଲିସ ଓଡିଶା ଆଣୁଥିବା ଜଣା ପଡିଛି । ମୁଖ୍ୟ ଅଭିଯୁକ୍ତ ହେଲା ତେରୋହି ଗ୍ରାମର ଗଣେଶ୍ୱର ବେହେରାଙ୍କ ପୁଅ ପ୍ରମୋଦ ବେହେରା (୨୬) ।
ମିଳିଥିବା ସୂଚନା ଅନୁଯାୟୀ, ପୋଲିସ ଯୁବକକୁ ଚେନ୍ନାଇରୁ ଧରି ଭୁବନେଶ୍ୱର ବିମାନ ବନ୍ଦରରେ ପହଞ୍ଚି ସାରିଛି । ଏଠାରୁ ଯୁବକକୁ କେନ୍ଦ୍ରାପଡା ପୋଲିସ ମୁଖ୍ୟାଳୟ ନିଆଯିବ । ପୋଲିସ ଟିମ୍ ସହ ଫରେନ୍ସିକ ଟିମ୍ ଆଜି ପୁଣି ଥରେ କାଠିଆପଡା ଘଟଣାସ୍ଥଳରେ ପହଞ୍ଚି ତଦନ୍ତ କରିବେ । ପୋଲିସ ପୁରୁଷ ବନ୍ଧୁକୁ ପଚରା ଉଚୁରା କରିବା ସହ କୋର୍ଟରେ ହାଜର କରାଇ ରିମାଣ୍ଡରେ ନେବ । ଖୁବ୍ ଶୀଘ୍ର ଏହି ଘଟଣା ଉପରୁ ପରଦା ହଟିବ ବୋଲି ଆଶା କରାଯାଉଛି । କେଉଁ ପରିସ୍ଥିତିରେ ଯୁବତୀ ଆତ୍ମହତ୍ୟା କଲେ, ଏହି ଘଟଣାରେ ଆଉ କାହାର ସଂପୃକ୍ତି ରହିଛି ଏସବୁର ଉତ୍ତର ପୋଲିସକୁ ଶୀଘ୍ର ମିଳିବ ।
ସୂଚନାଯୋଗ୍ୟ, ବୁଧବାର ଜଣେ ଯୁବତୀ ପୂର୍ବତନ ପ୍ରେମିକାଙ୍କ ବାରମ୍ବା ବ୍ଲାକମେଲିଂ ଧମକର ଶିକାର ହେବା ପରେ ଦେହରେ କିରୋସିନି ଢାଳି ଆତ୍ମହତ୍ୟା କରିଥିଲେ । ପ୍ରେମିକ ଜଣକ ତାଙ୍କର ଅଶ୍ଳୀଳ ଫଟୋ ସାମାଜିକ ଗଣାମାଧ୍ୟମରେ ପ୍ରସାରିତ କରିବା ସହ ଯୁବତୀଙ୍କୁ ବ୍ଲାକମେଲିଂ କରିଥିଲେ । ଯୁବତୀ ଏହି ବିଷୟରେ ପରିବାର ଲୋକଙ୍କୁ ଜଣାଇଥିଲେ । ପରିବାର ଲୋକେ ଥାନାକୁ ଯାଇ ସଂପୃକ୍ତ ଯୁବକଙ୍କ ବିରୋଧରେ ଅଭିଯୋଗ କରିଥିଲେ । ହେଲେ ପୋଲିସ ଏଫଆଇଆର ରୁଜୁ କରି ନ ଥିଲା । ଓଲଟା ସମସ୍ତ ସାମାଜିକ ଗଣମାଧ୍ୟମରେ ଯୁବକଙ୍କୁ ବ୍ଲକ ମାରିବାକୁ ପୋଲିସ ଯୁବତୀଙ୍କୁ କହିଥିଲେ । ଏମିତି ୬/୭ ମାସ ଧରି ଚାଲିଥିଲା । ଯୁବକର ବ୍ଲାକମେଲିଂରେ ହତାଶ ହୋଇ ଶେଷରେ ନିଜର ଜୀବନ ହାରିବାକୁ ଚରମ ନିଷ୍ପତ୍ତି ନେଇଥିଲେ ଯୁବତୀ । ଆଉ ଘରେ କେହି ନ ଥିବା ସମୟରେ ନିଜ ଦେହରେ କିରୋସିନି ଢାଳି ନିଆଁ ଲଗାଇ ଦେଇଥିଲେ ।
