ନୂଆପଡ଼ା ଉପନିର୍ବାଚନ ପାଇଁ ରଣନୀତି ପ୍ରସ୍ତୁତ ହୋଇଛି : ବସନ୍ତ ପଣ୍ଡା
ଭୁବନେଶ୍ବର ୧୨/୧୦: ନୂଆପଡ଼ା ଉପନିର୍ବାଚନରେ ତାଙ୍କ ଭୂମିକା ରହିବ ବୋଲି ପୂର୍ବତନ ବିଜେପି ରାଜ୍ୟ ସଭାପତି ବସନ୍ତ ପଣ୍ଡା କହିଛନ୍ତି । ସେ ଆହୁରି ମଧ୍ୟ କହିଛନ୍ତି ତାଙ୍କ ଭୂମିକା ଆଗରୁ ଥିଲା ଏବେ ବି ରହିବ ।
ଜୟ ଢୋଲକିଆଙ୍କୁ ବିଜେପିକୁ ସ୍ଵାଗତ । ମାନସିକତା ଥିଲେ ସବୁ ଠିକ୍ ହେଇଯିବ । ପ୍ରାର୍ଥୀ କିଏ ହେବ ତାହା ପାର୍ଲିଆମେଣ୍ଟାରୀ ବୋର୍ଡ ନିଷ୍ପତ୍ତି ନେବ । ଆଜିର ବୈଠକରେ ଅନେକ ବିଷୟରେ ଆଲୋଚନା ହେବ ।
ନୂଆପଡ଼ା ଉପନିର୍ବାଚନ ଉପରେ ମଧ୍ୟ ଆଲୋଚନା ହେବ । ମୁଁ କର୍ୟ୍ୟକର୍ତ୍ତା କାଲି ଥିଲି ଆଜି ବି ଅଛି । ନୂଆପଡ଼ାରେ ବିଜେପି ଶତ ପ୍ରତିଶତ ଜିତିବ । ମୋହନ ସରକାରରେ ଆଉ ଏକ ଫୁଲ ଫୁଟିବ ବୋଲି ବସନ୍ତ ପଣ୍ଡା କହିଛନ୍ତି ।
ବିଜେପିର ମିଶ୍ରଣ ପର୍ବରେ ଜୟ ଢୋଲକିଆ ବିଜେପିରେ ମିଶିଥିଲେ । ଏହା ପୂର୍ବରୁ ବସନ୍ତ ପଣ୍ଡାଙ୍କ ମାନଭଞ୍ଜନ କରାଯାଇଥିବା ସୂଚନା ମିଳିଥିଲା । ରାଜ୍ୟ ଅତିଥି ଭବନରେ ୩ ଘଣ୍ଟା ଧରି ଚାଲିଥିଲା ବୈଠକ । ରାଜ୍ୟ ବିଜେପି ସଭାପତି ମନମୋହନ ସାମଲ ଓ ସାଙ୍ଗଠନିକ ମହାମନ୍ତ୍ରୀ ମାନସ ମହାନ୍ତି ପ୍ରମୁଖ ବସନ୍ତ ପଣ୍ଡାଙ୍କ ମାନଭଞ୍ଜନ କରାଇଥିବା ସୂଚନା ମିଳିଥିଲା ।
ବୈଠକ ପରେ ବସନ୍ତ ପଣ୍ଡା ଜୟ ଢୋଲକିଆଙ୍କ ମିଶ୍ରଣ ପର୍ବରେ ଯୋଗ ଦେଇଥିଲେ । ଜୟ ଢୋଲକିଆ ପଦ୍ମ ଧରିବା ପରେ ବଡ଼ ମନ୍ତବ୍ୟ ରଖିଥିଲେ ବସନ୍ତ ପଣ୍ଡା । ସେ କହିଥିଲେ, ବିଜେପି ଯାହାକୁ ପ୍ରାର୍ଥୀ କରିବ ମୁଁ ତା ପାଇଁ ପ୍ରଚାର କରିବି । କିନ୍ତୁ ପ୍ରୀର୍ଥୀ କିଏ ହେବ ସ୍ପଷ୍ଟ ହୋଇନି । ମା’ ମାଟି ଦଳ ପାଇଁ କାମ କରିବି । ମୁଁ ନୂଆପଡ଼ା ପାଇ ସଂଘର୍ଷ କରିଛି । ମା’ ମାଟି ପାଇଁ ଉତ୍ସର୍ଗୀକୃତ ।
ଜୟ ଢୋଲକିଆ, ବସନ୍ତ କି ଅଭିନନ୍ଦନ କି ଆଉ କିଏ ପ୍ରାର୍ଥୀ ହେବ ତାହା ଜଣାପଡିନି । ହେଲେ ମୁଁ ନୂଆପଡ଼ା ପାଇଁ କାମ କରୁଛି, କରୁଥିବି ବୋଲି କହିଥିଲେ ବସନ୍ତ ପଣ୍ଡା । ମୁଁ କାର୍ୟ୍ୟକର୍ତ୍ତା ଥିଲି ଆଉ ଏବେ ବି ରହିଛି । ଦଳ ଯାହା ନିଷ୍ପତ୍ତି ନେବ ତାହା ହେବ । ନୂଆପଡା ଉପ ନିର୍ବାଚନ ନେଇ ସ୍ବର୍ଗତ ରାଜେନ୍ଦ୍ର ଢୋଲକିଆ କ’ଣ ସ୍ବପ୍ନ ଦେଖିଥିଲେ ତାହା ସେ ଜାଣିଛନ୍ତି ବୋଲି ବସନ୍ତ ପଣ୍ଡା କହିଥିଲେ ।
ସୂଚନାଯୋଗ୍ୟ ଯେ, ୨୦୨୪ ବିଧାନସଭା ନିର୍ବାଚନରେ ନୂଆପଡ଼ା ନିର୍ବାଚନମଣ୍ଡଳୀରେ ବିଜେପିରୁ ବସନ୍ତ ପଣ୍ଡାଙ୍କ ପୁଅ ଅଭିନନ୍ଦନ ପଣ୍ଡା ପ୍ରାର୍ଥୀ ହୋଇଥିଲେ । କିନ୍ତୁ ବିଜେଡିର ରାଜେନ୍ଦ୍ର ଢୋଲକିଆଙ୍କ ଠାରୁ ହାରିଯାଇଥିଲେ । ତେବେ ରାଜେନ୍ଦ୍ର ଢୋଲକିଆଙ୍କ ମୃତ୍ୟୁ ପରେ ନୂଆପଡ଼ାରେ ଉପନିର୍ବାଚନ ହେବାକୁ ଯାଉଛି । ସ୍ବର୍ଗତ ରାଜେନ୍ଦ୍ର ଢୋଲକିଆଙ୍କ ପୁଅ ଜୟ ଢୋଲକିଆ ବିଜେପିରେ ମିଶିଛନ୍ତି । ତେବେ ନୂଆପଡାରେ କିଏ ପଦ୍ମ ଟିକେଟରେ ନିର୍ବାଚନ ଲଢ଼ିବେ ତାକୁ ନେଇ ନାନା କଳ୍ପନାଜଳ୍ପନା ଚାଲିଛି । ତେବେ ଜୟ ଢୋଲକିଆ ବିଜେପିରେ ମିଶିବା ପରେ ତାଙ୍କୁ ଦଳ ନୂଆପଡାରୁ ପ୍ରାର୍ଥୀ କରିପାରେ ବୋଲି ଚର୍ଚ୍ଚା ହେଉଛି ।
