ଗଜପତି : ଜିଲ୍ଲାସ୍ତରୀୟ ରାଷ୍ଟ୍ରୀୟ ପୋଷଣ ମାସ ୨୦୨୫ କାର୍ଯ୍ୟକ୍ରମ ଅନୁଷ୍ଠିତ

ଗଣେଶ କୁମାର ରାଜୁଙ୍କ ରିପୋର୍ଟ
ଗଜପତି, ୧୧/୧୦ : ଗଜପତି ଜିଲ୍ଲା ସଦର ମହକୁମା ପାରଳାଖେମୁଣ୍ଡି ସ୍ଥିତ ଜିଲ୍ଲାପାଳଙ୍କ କାର୍ଯ୍ୟାଳୟର ସମ୍ମିଳନୀ କକ୍ଷ ଠାରେ ଆଜି ଜିଲ୍ଲା ସମାଜ କଲ୍ୟାଣ ବିଭାଗ ପକ୍ଷରୁ ଜିଲ୍ଲାସ୍ତରୀୟ ରାଷ୍ଟ୍ରୀୟ ପୋଷଣ ମାସ ୨୦୨୫ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି ।
ଗତ ତା:-୧୭ ସେପ୍ଟେମ୍ବର ଠାରୁ ଚଳିତ ମାସର ୧୬ ତାରିଖ ପର୍ଯ୍ୟନ୍ତ ପୋଷଣ ମାସ ପାଳନ ଅବସରରେ ଜିଲ୍ଲାର ବିଭିନ୍ନ ଅଙ୍ଗନବାଡି ଓ ସେକ୍ଟର ମାନଙ୍କରେ ମାସ ବ୍ୟାପି ବିଭିନ୍ନ କାର୍ଯ୍ୟକ୍ରମ ଅନୁଷ୍ଠିତ ହୋଇଥିବା ବେଳେ ଆଜି ଜିଲ୍ଲାସ୍ତରୀୟ କାର୍ଯ୍ୟକ୍ରମରେ ମଧ୍ୟ ବିଭିନ୍ନ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା ।
ଅତିରିକ୍ତ ଜିଲ୍ଲାପାଳ ଶ୍ରୀ ଫାଲଗୁନୀ ମାଝୀ ଏହି କାର‌୍ୟ୍ୟକ୍ରମରେ ମୁଖ୍ୟଅତିଥି ଭାବେ ଯୋଗଦେଇ କାର୍ଯ୍ୟକ୍ରମକୁ ଉଦଘାଟନ କରିଥିଲେ ।
ଏହି ଅବସରରେ ମଞ୍ଚାସିନ ଅତିଥି ମାନେ ଉତ୍ତମ ପୋଷଣ ସୁସ୍ଥ ଜୀବନ ତେଣୁ ପୋଷଣ ସମ୍ପର୍କରେ ଘରେ ଘରେ ଏହାର ଗୁରୁତ୍ଵ ଉପରେ ସଚେତନ କରାଇବା ସହ କୁପୋଷଣକୁ କିଭଳି ଦୂରୀକରଣ କରିବା , ଲୋକଙ୍କ ମଧ୍ୟରେ ସେମାନଙ୍କ ମାନସିକତା ଓ ବ୍ୟବହାରରେ ପରିବର୍ତ୍ତନ ଆଣିବା ଯାହା ଫଳରେ କୌଣସି ଶିଶୁ ଯେଭଳି କୁପୋଷଣର ଶିକାର ହେବେ ନାହିଁ ଏବଂ ଏଥିସହ ଆମ ସମାଜ ଓ ଆମ ଜିଲ୍ଲା ଏକ ସୁ ପୋଷିତ ତଥା ସୁସ୍ଥ ପୋଷଣ ଜିଲ୍ଲା ଭାବେ ଗଠନ ହେବାରେ ସହାୟକ ହୋଇପାରିବ ବୋଲି କହିଥିଲେ ।
ଜିଲ୍ଲା ପୋଷଣ ଅଭିଯାନ ସଂଯୋଜିକା ଶ୍ରୀମତୀ ପାୟଲ ପାଣିଗ୍ରାହୀ ଯୋଗ ଦେଇ ଭାରତ ସରକାରଙ୍କ ଏହି ପୋଷଣ ଅଭିଯାନ ଏକ ଫ୍ଲାଗ-ସିପ ଯୋଜନା କାର୍ଯ୍ୟକ୍ରମ । ଜିଲ୍ଲାର ୭୦ ସେକ୍ଟର ସମେତ ୨୪୪୩ ଟି ଅଙ୍ଗନବାଡି କେନ୍ଦ୍ରରେ ମାସ ବ୍ୟାପି ବିଭିନ୍ନ କାର୍ଯ୍ୟକ୍ରମ ଅନୁଷ୍ଠିତ ହୋଇଛି ଚାଲିଛି ବୋଲି ସୂଚନା ପ୍ରଦାନ କରିଥିଲେ ।
କାର୍ଯ୍ୟକ୍ରମ ଅଧିକାରୀ ଶ୍ରୀମତୀ ସାରଳା ପାତ୍ର ଯୋଗଦେଇ ପୋଷଣ ଅଭିଯାନ କାର୍ଯ୍ୟକ୍ରମ ଅବସରରେ ରହିଥିବା ଥିମ୍ ଯାହାକି ସୂ-ପୋଷଣ ଯୋଗୁଁ ସୁସ୍ୱାସ୍ଥ୍ୟ ଗଠନ କରିବା ଉପରେ ମୁଖ୍ୟତଃ ମେଦ ବହୁଳତା କମାଇବା ପାଇଁ ଚିନି , ନୁଣ ଓ ତେଲ ଖାଇବା କମ୍ ଉପରେ ସଚେତନ କରାଇବା , କନ୍ୟା ଶିଶୁ ଜନ୍ମ ହେଲେ ଗଛ ଲଗାଇବା , ସ୍ୱଦେଶୀ ଜିନିଷକୁ ବ୍ୟବହାର କରି ବିଦେଶୀ ଜିନିଷକୁ ପରିତ୍ୟାଗ କରିବା , ଶୁନ\’ରୁ ୩ ବର୍ଷ ବୟସର ପିଲାଙ୍କ ବୌଦ୍ଧିକ ବିକାଶ ପ୍ରତି ଅଧିକ ଧ୍ୟାନ କରାଇବା ପ୍ରଭୃତି ଉପରେ ଆଲୋଚନା କରିଥିଲେ ।
ଏହି କାର୍ଯ୍ୟକ୍ରମରେ ଜିଲ୍ଲା ସମାଜ କଲ୍ୟାଣ ଅଧିକାରୀ ଶ୍ରୀମତୀ ମନୋରମା ଦେବୀ , ଜୀବିକା ମିଶନ ଜିଲ୍ଲା ସଂଯୋଜକ ଶ୍ରୀ ଟିମାନ ବାରା ଏବଂ କାର୍ଯ୍ୟକ୍ରମ ଅଧିକାରୀ ଶ୍ରୀମତୀ କେ: ସୁନିତା ପ୍ରମୁଖ ପୋଷଣ ଅଭିଯାନ ସମ୍ପର୍କରେ ନିଜର ଉପାଦେୟ ମତ ପ୍ରଦାନ କରିଥିଲେ ।
ଏହି ଅବସରରେ ପୋଷଣ ଯୁକ୍ତ ଖାଦ୍ୟ ଓ ପନିପରିବା ବିଭିନ୍ନ ବ୍ଲକର ଅଙ୍ଗନବାଡି କର୍ମୀ ମାନଙ୍କ ଦ୍ଵାରା ପ୍ରଦର୍ଶନ କରା ଯାଇଥିଲା ।
ପୂର୍ବରୁ ଅନୁଷ୍ଠିତ ବିଭିନ୍ନ ପ୍ରତିଯୋଗିତାର କୃତି ପ୍ରତିଯୋଗୀ ମାନଙ୍କୁ ଅତିଥି ମାନଙ୍କ ଦ୍ଵାରା ପୁରସ୍କାର ଓ ମାନପତ୍ର ବଣ୍ଟନ କରା ଯାଇଥିଲା ।
ଏହି ଅବସରରେ ଛାତ୍ରୀ ମାନଙ୍କ ଦ୍ଵାରା ନାଚ ଓ ଗୀତ ପରିବେଷଣ ହୋଇଥିଲା ।
ଶେଷରେ ଉପସ୍ଥିତ ସମସ୍ତଙ୍କୁ କାର୍ଯ୍ୟକ୍ରମ ଅଧିକାରିଣୀ ଶ୍ରୀମତୀ ସାରଳା ପାତ୍ର ଧନ୍ୟବାଦ୍ ଅର୍ପଣ କରିଥିଲେ ।