ବାପା ମା’ଙ୍କୁ ହରାଇ ଥିବା ଭାଇ ଭଉଣୀଙ୍କ ଦାୟିତ୍ୱ ନେଲେ ମନ୍ତ୍ରୀ ପ୍ରୀତିରଞ୍ଜନ

By Akshya Rout

ଯାଜପୁର,୦୪/୦୬ ; ଯାଜପୁର ଜିଲ୍ଲା ଦାନଗଦୀ ବ୍ଲକ ଓସ୍ତପାଳ ପଞ୍ଚାୟତର ପ୍ରମୋଦ ନାଥ ଏବଂ ତାଙ୍କ ପତ୍ନୀଙ୍କର ଅକାଳ ମୃତ୍ୟୁ ହୋଇଯାଇଛି । ଉଭୟଙ୍କ ମୃତ୍ୟୁ ପରେ ବେସାହାରା ହୋଇ ଯାଇଛନ୍ତି ତାଙ୍କର ୨ ଝିଅ ଏବଂ ଏକମାତ୍ର ଶିଶୁପୁତ୍ର। ବାପା ମା ଛେଉଣ୍ଡ ତିନି ସନ୍ତାନଙ୍କ ଆଖିରୁ ଲୁହ ଶୁଖୁ ନାହିଁ । ଏହି ହୃଦୟ ବିଦାରକ ଖବର ଶୁଣି ତୁରନ୍ତ ଓସ୍ତପାଳ ଗାଁରେ ପହଞ୍ଚିଥିଲେ ସୁକିନ୍ଦା ବିଧାୟକ ତଥା ଗ୍ରାମ୍ୟ ଉନ୍ନୟନ, ଦକ୍ଷତା ବିକାଶ ଓ ବୈଷୟିକ ଶିକ୍ଷାମନ୍ତ୍ରୀ ଇଂ ପ୍ରୀତିରଞ୍ଜନ ଘଡ଼ାଇ। ସମସ୍ତଙ୍କ ସହିତ ଏ ନେଇ ଆଲୋଚନା କରିବା ପରେ ବଡ଼ ଭଉଣୀ ଇତିଶ୍ରୀଙ୍କ ଉଚ୍ଚଶିକ୍ଷାର ଦାୟିତ୍ୱ ନେବା ସହ ସାନ ଭଉଣୀ ସ୍ମୃତିରେଖା ଓ ପୁଅ ସତ୍ୟଜିତର ପାଠପଢ଼ାର ଦାୟିତ୍ୱ ନେଇଛନ୍ତି ଇଂ ଘଡାଇ । ତୁରନ୍ତ ଶୁଦ୍ଧକ୍ରିୟା ଲାଗି ଆର୍ଥିକ ସହଯୋଗ ପ୍ରଦାନ କରିବା ସହ ଏହି ପରିବାରର ସାମଜିକ ଦାୟିତ୍ୱ ନେବା ଲାଗି ବିଜେଡି କର୍ମୀମାନଙ୍କୁ ନିର୍ଦ୍ଦେଶ ଦେଇଥିଲେ । ଏହାପରେ ଗ୍ରାମର ମୁରବି ମାନଙ୍କ ସହିତ ମଧ୍ୟ ଆଲୋଚନା କରିଥିଲେ । ଏ ନେଇ ମନ୍ତ୍ରୀ ଇଂ ଘଡାଇ କହିଛନ୍ତି ମୁଁ ମୋର କର୍ତ୍ତବ୍ୟ କରିଛି । ଅସମୟରେ ସେମାନଙ୍କ ପାଖରେ ଛିଡା ହେବା ଆମ ସମସ୍ତଙ୍କ କର୍ତ୍ତବ୍ୟ । ଏଭଳି ବିପଦ ଭଗବାନ କାହାକୁ ନ ଦିଅନ୍ତୁ ।